En 2023, l’Academia de la Llingua concedió a Lourdes Álvarez el Premiu Nacional de Lliteratura Asturiana. Con esti motivu, publicóse una antoloxía precedida d’un prólogu de Carmen Alfonso García. El llibru taba formáu polos poemarios “Aldabes del olvidu” (1990), “Mares d’añil” (1992), “Como aquella que yeres” –Premiu Teodoro Cuesta 1994 inéditu hasta 2006–, “Son del tardíu” (2006) y “P’anular los adioses” (2018). Amás, incluyéronse poemes y cuentos que l’autora sacara en distintes publicaciones.
L’azar quixo que nel mesmu añu s’acumularan dos recopilaciones de la obra de Lourdes Álvarez: unos meses antes diera a la imprenta “Coles señes del agua” (Bajamar Ediciones), un volume con ilustraciones na portada y na contraportada de Naciu ‘i Riguilón y un prólogu de Raquel Fernández Menéndez onde axuntara tolos poemarios mentaos.
Lourdes Álvarez ye una de les autores más conocíes y estudiaes de la poesía asturiana actual. Desque Xosé Bolado la incluyera na “Antoloxía poética del Resurdimientu” (1989), el so nome nunca dexó d’apaecer nes esbilles que diben saliendo. El propiu Bolado-y consagró una dientro de la colección “Tiempu de Cristal” del Atenéu Obreru de Xixón y Leopoldo Sánchez Torre incluyóla nel volume “Les muyeres y los díes na poesía asturiana contemporánea”.
A lo llargo de toos estos años, la crítica vien recalcando la coherencia de la escritura de Lourdes Álvarez, una poeta que siempre mostró una voz personal y bien reconocible. Les interpretaciones y los análisis, en contraste colo anterior, fueron cambiando, de resultes d’una evolución temática y estilística que non siempre se señaló lo suficiente y de la tresformación de los propios enfoques crítico-lliterarios. La recurrencia de temes como la soledá –”soles la mar y yo”– y la tendencia a emplegar imáxenes rellacionaes cola naturaleza pa espresar el mundu emocional propiu –”crezo como broza d’espaldes a les flores”– valieron pa considerala una poeta intimista. Esta calificación convirtióse nun tópicu pol enfotu de la crítica asturiana finisecular en reducir los cambios que se taben rexistrando na poesía a patrones xeneracionales, sin anotar les conexones esistentes cola obra d’otres autores como Concha Quintana o la Berta Piñán de “Vida privada”.
Con esta última y con Esther Prieto, comparte la importancia concedida al tema de la salida de la casa familiar pa establecese na ciudá, un tema que xenera, en palabres de Leopoldo Sánchez Torre, una dialéctica ente “l’estrañamientu”, desplegáu na espresión de la insatisfacción esistencial, y “l’entrañamientu”, qu’empobina la mirada hacia’l pasáu: “¿Son esto les estaciones? / ¿Son esto qu’agora siento […] / que pasa como pasa’l ritmu la ciudá, o lo qu’enantes fueron: sol, / mariello, nieve / y flores, cuando se ye pequeña?”. La interiorización del éxodu rural produz una tensión que de primeres se vive como una lliberación angustiosa polo que conlleva de desenraizamientu –”Diz que-y duel l’escaecese del so ser”– y que pronto va sentise, en bien de poetes asturianos, como perda del mundu de la infancia –”Vuelvo a nacer n’El Picu la Maera”.
Más allá de les implicaciones étiques qu’encuentren nesta escritura, pol poder que tien de denunciar una realidá alienante, críticos como Bolado y Raquel Fernández Menéndez, lo cierto ye que la poesía de Lourdes Álvarez edificóse dende lo primero sobre’l compromisu –”Ámovos palabres-xiblu que me peslláis los llabios”–, resignificando los oxetos del llugar d’orixe –”D’esti tiempu de dubies fadré la casa / nueva…”– y el paisaxe de la neñez –”Ríu abaxo cuerren les voces vieyes”–. El simbolismu y l’animismu que-y atribuyó Bolado –”dientro mio, guaña la primavera”– sobrepónense al interés pola xenealoxía campesina, que se condensa na figura de la madre, recipiente de la tradición rural y femenina y fonte, al mesmu tiempu, de la identidá personal: “Puedo morrer agora, madre, / alma y cordal, materia tuyo”. La suya ye, en definitiva, una escritura polisémica qu’esplora, al traviés de distintes formulaciones estilístiques, les connotaciones del universu del orixe pa referise simultáneamente al ser de l’autora, al ser –familia o país– de la sociedá a la que pertenez y al ser del territoriu: “De la tierra l’arume enxugo”.
Premiu Nacional de Lliteratura Asturiana 2023
Lourdes Álvarez
ALLA, 143 páxines, edición non vendible
Coles señes del agua
Lourdes Álvarez
Bajamar Editores, 187 páxines, 17 euros
Cola ayuda de la Conseyería de Cultura, Política Llingüística y Turismu del Principáu d’Asturies
Suscríbete para seguir leyendo