Hoc signo vincitur inimicus

“Vincitur inimicus” –espresión tomada del escudu d’Asturies– ye la segunda novela histórica de Xandru Martino, un autor que s’estrenó nesti xéneru con “Nunn” (Delallama, 2020). En contraste con esta obra, onde l’autor escoyó un momentu crepuscular de la Historia del territoriu –el fin de la resistencia contra l’Imperiu romanu–, “Vincitur inimicus” céntrase nel reináu d’Alfonsu II, esto ye, nuna etapa d’afitamientu de la identidá política asturiana.

No que cinca a la biografía d’esti monarca, Martino sigue de cerca les cróniques asturianes de finales del s. IX, que contrasta convenientemente con fontes modernes. Asina, menciónense o cuéntense la infancia en Pravia al amparu de la reina Adosinda, tía suya; los sobresaltos de los primeros años del reináu, cuando otru tíu, Mauregatu, arrampúña-y el tronu que, depués d’escapar a tierres vascones y retirase un tiempu nel monasteriu d’Abelania/Ablaña, consigue recuperar; el matrimoniu con Berta, hermana de Carlomagnu; el cambiu de capitalidá a Uviéu; la construcción d’edificios de gran valor artísticu como les ilesies de San Tirso y Santullano; la ofrenda a l’antigua Catedral de San Salvador de la Cruz de los Ánxeles; la llucha continua contra los árabes, qu’afala, por interés mutuu, a caltener la concordia con Carlomagnu; la toma de posición contra la herexía adopcionista; el descubrimientu de los restos del apóstol Yagu, que da pie a crear la ruta compostelana… Fechos que, en conxuntu, ofrecen la imaxe d’un gran reináu nuna dómina na qu’Asturies ocupaba un sitiu importante na política europea, non llibre de tensiones colos grandes núcleos de poder: el Papa de Roma, l’Emiratu de Córdoba y l’Imperiu carolinxu.

Con esti material, Martino ellabora una novela onde s’alternen dos discursos distintos: el del monxu Pelayu, que de mano se presenta como una crónica que-y encarga’l Rei y que, pasu ente pasu, va ganando suxetividá hasta algamar el tonu confesional propiu d’un diariu; y el testu de la crónica propiamente dichu, que gasta una tipografía medieval y apaez intercaláu, en páxines sueltes, pente’l primer rellatu. Martino fai un esfuerzu estimable por inxertar elementos esperimentales nuna trama que-y vien dada pola Historia de la qu’aspira a recalcar aspectos concretos.

Ún de los más notorios, amás de la combinación de discursos descrita, ye l’alteración de la secuencia cronolóxica, tanto nel discursu del amanuense Pelayu como nel testu de la crónica sobre Alfonsu. Con esti recursu, l’autor non solo evita la llinialidá, promoviendo la participación de los llectores; paez que busca tamién un efectu fragmentariu, como queriendo sacar palabra viva -esto ye, personal y, no que cinca a los temes, cambiante- del llinguaxe ríxidu y formal de les cróniques. Arriendes d’ello, el discursu del monxu, qu’empieza utilizando verbos en presente –”…con estes les mios primeres lletres […] entamo a trabayar d’amanuense del rei”–, da pasu a una socesión de flash-back que remiten a momentos cronolóxicos estremaos.

El proyectu ye ambiciosu por demás. Quiciabes por eso, depués de llograr que los llectores acepten la condición fragmentaria y polifónica del llibru y lleguen a interpretar la dixebra ente los dos discursos como una falta a la verdá histórica, el final de la obra, con un narrador que sigue contando fechos fuera del scriptorium, resulta algo sorprendente. Como na novela “Bomarzo” –que non por ello dexa de ser un llibru escelente– oblíganos a preguntanos pola naturaleza del espaciu ficcional del que surde la escritura y pol calter d’esi yo que quiciabes muestra n’escesu la so condición de personaxe.

Cola ayuda de la Conseyería de Cultura, Política Llingüística y Turismu del Principáu d’Asturies