El vértigu del guepardu

La edá de la memoria llegó-y a Esther Prieto, autora d’un poemariu col mesmu títulu publicáu en 1992, al pasar la trentena, nesi momentu-crisálida que precede al empiezu d’una vida nueva. La poesía reflexiva y esistencial de Prieto tenía un aquel de refugu del pasáu y ritu de pasu. Nel casu de Miguel Rojo, la mirada retrospectiva asume una forma y una significación diferentes. Nesti poemariu billingüe, que presenta una doble versión, n’asturianu –con testos nes variedaes estándar y suroccidental– y en castellanu, rellátense, combinando’l versu llibre cola prosa poética, dellos momentos de la vida del autor dende distintes perspectives: dacuando acercando’l pasáu col telescopiu de l’alcordanza pa recrealu y recuperalu –”Delles veces espierto al xiblíu d’un tren…”– y otres veces, evocándolu pa recalcar los sentimientos de perda y caída que deriven de la mengua de la fuerza física y espiritual –”¿Ónde se perdió’l color de los suaños?”–; nunes ocasiones, usando’l tonu llixeru de quien rellata una anécdota prestosa –”Cuando salíemos del cuartu del hotel / descubrimos aquella notina baxo la puerta”– y n’otros casos, afondando na emoción –”Oh, vieyu corazón, ¿por qué tas tan triste cuando sorrís? / Oh, mio corazón, ¿por qué?”–.

El llibru divídese en tres partes que se refieren a tres etapes de la vida del autor: “La edá del l.limiagu”, “La edá del guepardu” y “La edá del buei”, una versión personal del tópicu de les tres edaes del ser humanu que se rellaciona con espresiones del propiu llibru. Na primera parte, socédense les estampes de la infancia, estructuraes, caúna d’elles, como un microrrellatu. Esta sección, en conxuntu, ofrez los testos más llograos y ellaboraos. La perspectiva suxetiva que brinda l’usu de la primera persona narrativa combínase con maña con diverses técniques como’l monólogu interior, l’estilu indirectu llibre, el presente históricu o les preguntes retóriques, pa presentar a los llectores una colección de recuerdos destinaos a trayer al presente la visión infantil del mundu.

El rellatu vital que Miguel Rojo va desarrollando nes secciones siguientes instaura una tensión ente’l pasáu vivíu na inconsciencia, que’l poeta adultu identifica primero cola inocencia y más tarde col vitalismu y la espontaneidá, y el pasáu reinterpretáu dende’l cansanciu de la madurez. Según vamos avanzando na llectura, el recuerdu cómpliz de la infancia y la mocedá va dando pasu a la señardá –”¿Acaso aquel xestu nun foi’l meyor poema d’amor / que nunca enantes t’escribiera?”– y al sentimientu de perda –”Ainda nueva, puede permitise’l luxu del xuegu / el luxu de la perda”–.

La tensión gana intensidá hacia’l final del llibru, cuando los fechos evocaos se presenten como recuerdos anticipaos qu’apunten a un futuru que se texe nel discursu poéticu –”Pero si miro bien ehí siguimos xugando a fútbol en mediu la cai / […] ¿Acaso nun sois a veme / si entornáis un poco los güeyos?”–. La falcatrúa sintetiza, en ciertu mou, l’alquimia que se produz nel llibru: l’alcordanza nun val solo pa suavizar la perda, representa tamién una oportunidá pa manifestase; los recuerdos nun respuenden al caprichu de la memoria, son muestres o nicios del pensamientu vitalista del autor: “Prefieres el vértigu solitariu del guepardu / a la triste productividá de los bueis qu’aren la tarde”.

El tiempu ye, nesti llibru, la materia prima de la poesía y ésta ofrez una oportunidá de cumplir o entender lo inacabao y lo fallío; constituye, en definitiva, una forma de perfeccionar la vida, de convertir en mitu les vivencies propies, dexando constancia, per aciu de la tresformación, d’ún mesmu. Pues, “¿Acaso nun necesitamos toos della eternidá…?”.