[ad_1]
Esti añu cúmplense cincuenta años dende la creación de Conceyu Bable, que ye como dicir que se conmemoren los cincuenta años d’esistencia del movimientu de reivindicación del asturianu que conocemos güei, esto ye, un movimientu cívicu que trabaya pol usu llibre d’esta llingua na conversación ordinaria, na producción artística y nos ámbitos formales de comunicación. L’aniversariu va dar pie a delles celebraciones. El 14 de marzu, l’Academia de la Llingua Asturiana va dedica-y una xornada titulada “Xorrecíes tán les manes. Mediu Sieglu de Conceyu Bable na perspeutiva de l’ALLA” y el Gobiernu d’Asturies consagró-y la XLV Selmana de les Lletres Asturianes.
En xunetu de 1974, tres profesores mozos, Xosé Lluis García Arias, Xuan Xosé Sánchez Vicente y Lluis Xabel Álvarez apaecieron entrevistaos na revista “Asturias Semanal” defendiendo l’usu oral y escritu del “bable” col aquel de dignificalu y frenar el procesu de sustitución pol castellanu. Depués de recibir delles cartes d’apoyu, la revista, consciente del interés de los llectores pola llingua y la cultura asturianes, dio-yos una sección fixa, qu’empezó l’andadura, con una periodicidá quincenal, en payares de 1974. L’espaciu, que tuvo conteníos mui variaos, pronto pasó a ser selmanal y siguió saliendo hasta que desapaeció la publicación en xunu de 1977.
La sección periodística “Conceyu Bable” dio pasu darréu, con una rapidez desconcertante, a la formación de dos grupos d’activistes venceyaos a ella, ún n’Uviéu y otru en Xixón, a los que se fueron sumando los de Mieres, Avilés y Llangréu. Estos grupos rellacionábense ente ellos a traviés d’una estructura federal, esto ye, teníen autonomía, pero aconceyaben periódicamente nes xuntes de coordinación convocaes por una Apautaora.
El 22 de xunu de 1976, Conceyu Bable convoca una manifestación en Xixón pa pidir la presencia del asturianu na escuela, algo que yá reivindicaran los Amigos del Bable y que yera posible nel marcu de la Llei Xeneral d’Educación de 1970. Nesa manifestación, la primera autorizada que se fizo n’Asturies, onde participaron los partíos políticos de Coordinación Democrática, glayáronse les conseñes “Bable nes escueles, Autonomía rexonal”, dexando ver la dualidá del programa conceyista, qu’incluyía, al llau de la promoción del asturianu, una conciencia identitaria espresada nel pidimientu de descentralización.
En xunu de 1976, Conceyu Bable constitúyese como asociación llegal. Nos meses precedentes, a raíz del ésitu de la sección periodística del “Asturias Semanal”, los fundadores tuvieran dando clases d’asturianu n’Uviéu, Xixón y Avilés. Al equipu docente incorpóraranse Ana Cano y Mª Victoria Conde Saiz. Naquellos cursos, munchos escritores reconocíos, como Vicente García Oliva y Mª Teresa González, “descubrieron” l’asturianu como llingua de cultura. Pasu ente pasu, los grupos fueron incorporando otros talentos artísticos como Mánfer de la Llera, Lluis Antón González, Miguel Solís Santos o Carlos Rubiera y un númberu bultable d’enseñantes o futuros enseñantes que diben desempeñar un papel fundamental nel movimientu de recuperación llingüística: Urbano Rodríguez, Ana Fueyo, Xosé Mª García “Llábana”, Pablo Manzano, Xosé Antón González Riaño, Ramón d’Andrés…
Conceyu Bable foi, na primera época, un movimientu xuvenil que canalizó una parte bultable de la espresión cultural y política de la mocedá asturiano de la dómina. Pue que como consecuencia de lo que taba pasando n’otres zones d’España, nesi momentu la población más mozo algamó una conciencia llingüística y identitaria, qu’esplica l’ésitu inmediatu que tuvieron creaciones como’l “¡Puxa Asturies!”, la resignificación del “Asturies patria querida” o mesmo la recreación histórica de la bandera asturiana.
Col tiempu, Conceyu Bable tuvo una evolución política que llevó a l’asociación a publicar en 1977 el Cartafueyu Rexonal Asturianu. El fracasu de la candidatura rexonalista nes primeres elecciones fizo qu’una parte del movimientu cambiara de dirección y se volcara na enseñanza y nos estudios llingüísticos. Cola creación en 1980 de l’Academia de la Llingua, algunos socios, como García Arias, consagráronse definitivamente a esta estaya, mentanto qu’otros, como Sánchez Vicente, continuaron na acción política. A toos ellos debémos-yos la normalización en cursu del asturianu y los símbolos identitarios nos que se reconoz güei tola Comunidá.
Cola ayuda de la Conseyería de Cultura, Política Llingüística y Turismu del Principáu d’Asturies
[ad_2]
Source link