Paez mentira, pero la primera referencia y más expresiva del sintagma “arriba y abaxo” ye probablemente, por delantre de “cielu y tierra”, la serie británica de televisión “Upstairs, Downstairs”, de los años setenta del sieglu pasáu. Mui popular pa quien la seguimos entós, nun taría de más que se revisara pa notar cómo yeren les coses de la clase social, del sexu y de la raza anantes de que s’enguedeyaren col brexit y col queer. Nun ye qu’andaren perfeches n’aquella dómina sinon que hai qu’iguales agora anantes de que-y soceda a la especie humana dalgún estropiciu grave. Esa obra televisiva tien un algoritmu , como dicimos nel presente, pol que’l caballeru Bellamy y familia viven nel pisu londinense nel que en baxando les escaleres entramos a la cocina y cuartos del serviciu que trabaya a les órdenes del mayordomu Hudson. Nun resulta difícil albidrar qu’una perfomance probable d’esa tema artística llevaría a contar cómo el grupu de Hudson xube al pisu y el de Bellamy baxa a les cocines. De fechu hai hermenéutes y crítiques que podríen lleer eso en munchos sitios del arriba y abaxo, por exemplu na política española: el presidente Sánchez fairía de mayordomu colos suyos mentes que’l restu de la familia española trabayaría pa él nel pisu d’abaxo. Nostante, más pallá de la groma y del tormentosu aniciu de les vacaciones braniegues, igual habría qu’entrugar esto: ¿ú queda n’Asturies l’arriba y l’abaxo?
Poco anantes de qu’entamáramos a ver “Upstair , Downstairs”, en 1970, dexó la Diputación Provincial ún de los meyores presidentes que tuvo: José López- Muñiz. Pero l’estilu y la obra de López-Muñiz siguióse en tolos años setenta como a la espera de l’autonomía política. Hai que desplicar a les xeneraciones más nueves qu’Asturies, n’un determináu momentu nun ye que paeciéremos la tercera rexón d’España, ye que yéramoslo dafechu. La Diputación de López-Muñiz yera la tercera en potencia económica y l’habilidá y autoridá d’él llevantaron hospitales, carreteres y complexos industriales con una eficacia y una priesa sorprendentes. Yeren los tiempos de la Sociedad Asturiana de Estudios Económicos e Industriales, el recordáu SADEI, qu’operaba nel ámbitu de López-Muñiz como think tank, el meyor casi seguru de los habíos equí. Amás, y hai que dicilo, los nuestros equipos de fubol taben tranquilamente en primera división y eso yera importante cuando los chavales falábemos con xente d’otres provincies, por exemplo nes vacaciones d’estudiu. Alcuérdome que nel mesmu añu 1970, en Devon –onde nun dexaba d’haber una tensión ente estudiantes más o menos franquistes y otros abiertamene demócratas– dábase por entendío qu’Asturies yera lo más, dempués de Madrid y Barcelona. Tornando al arriba y abaxo ye posible que nesos años tovía foren el gobernaor civil o el gobernaor militar les imáxines de lo que ta “arriba” pero en realidá yéralo D. José López-Muñiz dende una Diputación que nun dexaba de ser, de lloñe, la continuidá de la Xunta Xeneral esapaecía nel sieglu XIX, y más de cerque, l’anunciu d’un gobiernu autonómicu.
Por ciertu que Juan Cueto Alas conoció perbien la experiencia d’autonomía práutica de López-Muñiz y que cuando escribió en 1977 “Los heterodoxos asturianos” foi como si quixere da-y un fondu conceptual a la continuidá d’una Asturies que fora d’arriba y non d’abaxo. Recalco equí otra vegada la fórmula cuetista que vien na páxina 80 porque –repito– tengo mieu de que hasta Conceyu Bable nun la toviere en cuenta, aplicáu como taba al cien por cien a la sanación, recuperación y normalización del idioma. Diz asina: “La nacionalidad asturiana ha sido la condición para la articulación formal de otras nacionalidades”.
Cola ayuda del Gobiernu del Principáu d’Asturies
Suscríbete para seguir leyendo