Anuncié hai poco que contaba reseñar “Astures: Gens Hispaniae”, de José Ramón García Fernández (Trabe, 2023, 2024). Aproveché entós pa dar dalgunes carauterístiques del autor, sobremanera’l cariñosu alcuñu pol que tol mundu lu conoz: Monchu’l cura. Queda recordada asina la condición de clérigu, la cuala nun ye solo teórica y burocrática. Ye bien práctica y real como amosen bautizos, bodes y otres ceremonias nes que tantes persones amigues d’él, como Amelia y yo, tuvímoslu d’oficiante. Pero, si se quier saber más de quien subtitula’l llibru que voi comentar “Iglesia local y nación histórica” hai que lleer al aniciu “Preámbulo personal e intransferible: Monchu y la historia interminable”, por Evaristo Arce. L’escritor maliayés, con esi estilu inconfundible que tien d’iteraciones y adxetivos sonoros llogra un retratu total del carauter, de les vivencies y de la obra de José Ramón. Pa eso Monchu y él son paisanos de Villaviciosa, una de les villes pamidea más fines no que se refier al espíritu asturianu.
Hai varies formes especiales y significatives nel llibru de D. José Ramón García, Monchu, que convién destacar. Son XXIV capítulos, n’un volumen de 389 páxines, que van ensin títulu. ¿Por qué? Porque son en realidá parágrafos de tamañu mediu que respuenden a una estructura fonda y orixinal: l’autor considera’l llibru como obra d’una vida entera. ¿Y en qué sentíu? Nel que dende una serie de temes clásicos y recurrentes vanse ensertando novedaes y correiciones. Y qu’a midía que les décades van ufiertando datos la mente del escritor camuda y perfeiciona les sos posiciones d’historiador y de ciudadanu. Eso mesmo lleva tamién a una insólita última páxina (ensin númberu) na que más d’una cuarentena de persones conocíes de la cultura asturiana figuren como co-autores de correiciones o aportaciones. El llibru conviértese, en dalgún mou, n’obra colectiva baxo la proteición, como diz el textu, del promotor y propietariu de la editorial, D. Inaciu Iglesias, Marqués de Gastañaga.
Los temes que más rescamplen del llibru son los que xunen el desendolque del cristianismu cola idea y realidá de la nación. L’autor céntrase primero como ye lóxico n’Alta Edá Media, al rodiu de la significancia de Pelayo y Cuadonga. Pero lo cierto ye que la erudición y la teoría lleven enseguida a textos y episodios de la romanidá y s’allarguen dempués a les dómines modernes. El puntu central quiciavis ta en que’l Reinu d’Asturies, nel cumal de la política, la guerra, l’arte y la Ilesia en tiempos d’Alfonso II y Alfonso III, ye una nación dafechu n’un sentíu pareyu a lo qu’agora mesmo podemos llamar nación-estáu. Y que la nacionalidá, más o menos ñidia sigún époques, ya nun se perdió, nun esapaeció, hasta’l día de güei. A mí gústame’l saltu atrás de los milenta años col que’l autor visita la narración de Floro (y de Tito Livio). Lo que va a pasar, darreu qu’Augusto en persona tien d’ apaecer periquí a la gueta del oru de Les Médules. Los pervalerosos cántabros y ástures “inmunes Imperii agitabant”. Ya sé que la fras presta y que tien dos tornes posibles. Una dirá que como l’Imperiu nun-yos facía casu pues eso, qu’armaben baruyu. Y otra, más intuitiva y direuta, tamién val: los nuestros antepasaos, invulnerables, axitaben el Imperiu.
Les y los llectores aldovinarán que’l llibru doctu, racional y patrióticu de D.José Ramón, Monchu, contién muncho más de lo qu’equí traté. Pa finar citaré lo que diz del títulu na páxina 305: “La realidad histórica de la nación asturiana está patente desde la antigüedad: “Astures gens Hispaniae”, entendida como ente nacional, e Hispania como una realidad geográfica tal como se entiende en la Laudatio Hispaniae isidoriana”.
Cola ayuda del Gobiernu del Principáu d’Asturies
Suscríbete para seguir leyendo